‘Vendi ka nevojë për profesionistë’/ Begaj viziton Universitetin Mesdhetar të Shqipërisë Universiteti Mesdhetar i Shqipërisë mirëpriti në një vizitë zyrtare Presidentin e Republikës, Sh.T.Z. Bajram Begaj. Vizita u zhvillua në godinën qendrore të universitetit dhe në Fakultetin e Shkencave Mjekësore, ku Presidenti u prit nga themeluesi i universitetit, Akademik Prof. Dr. Anastas Angjeli, Rektori Prof. Dr. Adrian Civici, si dhe nga drejtues akademikë, pedagogë dhe studentë. Gjatë takimit, Akademik Prof. Dr. Anastas Angjeli vlerësoi misionin e Universitetit Mesdhetar në formimin e brezave të rinj sipas standardeve europiane. SINKRON “Universiteti Mesdhetar i Shqipërisë lindi me vizionin për të krijuar një institucion elitar të arsimit të lartë, me staf akademik profesionist dhe të përkushtuar për edukimin e studentëve sipas kërkesave të tregut dhe standardeve më të larta europiane. Sot, pas gati dy dekadash, jemi krenarë që universiteti ynë është pjesë e elitës së institucioneve shqiptare të arsimit të lartë”, u shpreh Prof. Dr. Anastas Angjeli. Nga ana e tij, Presidenti Bajram Begaj vlerësoi profilin akademik dhe zhvillimin e Universitetit Mesdhetar të Shqipërisë. Sinkron “Për mua është kënaqësi të jem në Universitetin Mesdhetar, një institucion që në më pak se dy dekada ka krijuar profilin e tij akademik dhe ka fituar një vend të rëndësishëm në arsimin e lartë shqiptar. Shqipëria ka nevojë për universitete që formojnë jo vetëm profesionistë, por edhe qytetarë që dinë të mendojnë lirshëm, të debatojnë dhe të mbajnë përgjegjësi publike”, u shpreh Presidenti Begaj. Ai nënvizoi gjithashtu rolin që universitetet private kanë luajtur në krijimin e alternativave, konkurrencës dhe ndërkombëtarizimit të sistemit universitar shqiptar. Gjatë vizitës, Presidenti zhvilloi takime me drejtuesit akademikë dhe vizitoi auditorët, laboratorët dhe ambientet universitare, duke u njohur nga afër me investimet infrastrukturore, programet akademike dhe standardet bashkëkohore të mësimdhënies dhe kërkimit shkencor që ofron Universiteti Mesdhetar i Shqipërisë.