Ambasadorja amerikane Yuri Kim dhe ambasadori i Bashkimit Evropian në Shqipëri Luigi Soreca janë takuar mesditën e së premtes me kreun e Këshillit të Emërimeve në Drejtësi, Ervin Pupe. Pas takimit, diplomatja amerikane shkroi në rrjetet sociale, se duke punuar bashkë KED, Presidenca dhe Parlamenti bënë të mundur që Gjykata Kushtetuese të ishte funksionale nga fundi i vitit 2020. Tashmë, shkruan Kim, ka ardhur koha që të arrihet kuorumi në Gjykatën e Lartë, për të mbushur vendet vakante në Kushtetuese. Nga ana tjetër, ambasadori Soreca shkruan se pasi Gjykata e Lartë të ketë hapur vendet vakante për Gjykatën Kushtetuese, KED do të ketë mundësi të procedojë më tej dhe të sigurohet që ky institucion I rëndësishëm të jetë tërësisht funksionale, në muajt e ardhshëm.