Rreziku i vdekjeve nga covid 19 është rreth 10 herë më i lartë në vendet ku pjesa më e madhe e popullatës është mbipeshë – thotë një raport i publikuar nga Forumi botëror i Obezitetit. Kërkuesit zbuluan se në fund të 2020, shkalla më e lartë e viktimave nga koronavirusi ishte 10 herë më e lartë në vendet ku më shumë se gjysma e të rriturve janë mbipeshë krahasuar me vendet ku më pak se gjysma janë mbipeshë. Ekipi ka ekzaminuar të dhënat nga universiteti Johns Hopkins dhe organizata botërore e shëndetësisë dhe ka zbuluar se nga 2.5 milionë viktima të koronavirusit të raportuara deri në fund të shkurtit, 2.2 milionë ishin në vendet ku më shumë se gjysma e popullatës është mbipeshë. Në një analizë të dhënash dhe studimesh nga më shumë se 160 vende, kërkuesit zbuluan se shkalla e vdekshmërisë nga koronavirusi rritej në vendet ku dominon obeziteti. Në vendet ku më pak se 40 për qind e popullatës ëhstë mbipeshë, ka një shkallë më të ulët vdekshmërie nga covidi, prej jo më shumë se 10 persona për 100 mijë banorë. Por në vendet me më shumë se 50 për qind të popullatës obeze, shkalla është shumë më e lartë, mbi 100 për 100 mijë banorë. Kërkuesit thonë se mbipesha mund të përkeqësojë edhe probleme të tjera shëndetësore dhe infeksione virale si H1N1, gripi apo MERS. Forumi botëror i obezitetit sugjeron se dhënia prioritet për personat me obezitet për testim dhe vaksinim, është e nevojshme. Në shba, rreth tre të katërtat e popullatës janë mbipeshë ose obezë sipas të dhënave të qendrës amerikane për kontrollin dhe parandalimin e sëmundjeve, dhe vendi ka edhe shifrën më të lartë të viktimave të koronavirusit në botë.