Avionët luftarakë polakë dhe ata të aleatëve u ngritën me urgjencë në fluturim mëngjesin e të martës për të garanatuar sigurinë e hapësirës ajrore polake pasi Rusia kreu sulme ajrore me rreze të gjatë veprimi që kishin në shënjestër Ukrainën perëndimore dhe zonat pranë kufirit me Poloninë, thanë forcat e armatosura të vendit anëtar të NATO-s. "Avionët luftarakë u ngritën në fluturim, dhe sistemet e mbrojtjes ajrore tokësore dhe të zbulimit me radar u vunë në gatishmëri të shtuar", tha komanda operacionale e forcave të armatosura në një postim në X. "Këto masa janë të natyrës parandaluese dhe synojnë sigurimin dhe mbrojtjen e hapësirës ajrore, veçanërisht në zonat ngjitur me rajonet e kërcënuara", tha komanda. Zyrtarët ukrainas raportuan sulme ajrore në disa rajone, përfshirë Kievin. Tre persona u plagosën në perëndim të qytetit, përfshirë një person që u shtrua në spital, tha kryebashkiaku i Kievit Vitaliy Klitschko. Ministria e energjisë e Ukrainës tha se Rusia kishte synuar infrastrukturën energjetike të vendit dhe se ndërprerjet e energjisë po preknin disa rajone të Ukrainës. Një mesazh i ngjashëm u nda nga operatori shtetëror i sistemit të transmetimit të energjisë elektrike të Ukrainës, Ukrenergo.