Kryeministri i Sllovakisë kërkonte një rrugë për në Moskë të enjten për të marrë pjesë në paradën e fitores të Luftës së Dytë Botërore, pasi Lituania mbylli hapësirën e saj ajrore për fluturimet që e çonin atë në këtë ngjarje dhe tha se vendet e tjera baltike vendosën kufizime të ngjashme po ashtu. Robert Fico, i cili u takua me Presidentin rus Vladimir Putin në Kremlin në dhjetor, është i vetmi udhëheqës i Bashkimit Evropian që planifikon të marrë pjesë në festimet e 9 majit në Moskë, të cilat do të përfshijnë një paradë ku do të marrin pjesë dhjetëra personalitete të huaja, përfshirë Presidentin kinez Xi Jinping. Presidenti i Lituanisë Gitanas Nauseda tha të mërkurën se vendi i tij kishte mbyllur hapësirën e tij ajrore për fluturimet që transportonin Ficon dhe Presidentin Aleksandar Vuçiç të Serbisë, për në Moskë. Avionët që udhëtojnë mes Rusisë dhe Evropës kanë përdorur zakonisht hapësirën ajrore lituaneze që kur transportuesve evropianë iu tha në vitin 2021 të shmangnin rrugën më të shkurtër përmes Bjellorusisë si pjesë e masave ndëshkuese kundër Minskut që kishte ngritur një avion luftarak për të detyruar një avion të Ryanair të ulej. Hapësira ajrore ukrainase, një tjetër rrugë më e shkurtër, është mbyllur që nga viti 2022 për shkak të pushtimit rus. Ministria e jashtme e Letonisë tha se nuk do të lejojë asnjë fluturim për në paradë, por nuk përmendi konkretisht udhëheqësin sllovak, ndërsa zyrtarët në Estoni thanë se nuk i është kërkuar leje për ndonjë kalim. "Estonia na ka thënë se nuk do të na lejojë të fluturojmë mbi territorin e saj, pavarësisht se Sllovakia ka një leje gjatë gjithë vitit për flotën qeveritare për të përdorur hapësirën ajrore estoneze", tha Fico në faqen e tij në Facebook. "Kjo po e ndërlikon jashtëzakonisht axhendën tonë sepse nuk jemi në gjendje të arrijmë eventet e planifikuara në Moskë". Fico është planifikuar gjithashtu të marrë pjesë në takime dypalëshe si edhe në një ceremoni të vendosjes së kurorave në Moskë. Planet e tij për të udhëtuar në Moskë nënvizojnë gatishmërinë e tij për të sfiduar Brukselin pasi diplomatja më e lartë e Bashkimit Evropian Kaja Kallas, një ish-kryeministre estoneze, këtë javë u kërkoi udhëheqësve të BE-së të mos marrin pjesë në festimet ushtarake të Rusisë.