Ministri i ri i Brendshëm, Taulant Balla u ka kërkuar zyrtarisht drejtuesve më të lartë të Policisë së Shtetit që të shtyjnë lejen e zakonshme, për pas muajit gusht. Duke pasur parasysh fluksin e lartë të turistëve që vizitojnë Shqipërinë gjatë kësaj periudhe, Balla ka kërkuar që ata të garantojën siguri maksimale dhe një sezon turistik sa më të qetë. Pikërisht për këtë arsye, Balla u ka bërë apel drejtuesve të lartë të Policisë së Shtetit që të qëndrojnë në detyrë gjatë gjithë muajit gusht, deri në përfundim të sezonit turistik. Vlen të theksohet se në verë, krahas rikthmit në masë të shqiptarëve që jetojnë në emigrim, shtohet ndjeshëm edhe numri i turistëve, që vizitojnë vendin tonë për të kaluar pushimet. E pikërisht për të garantuar një sezon turistik sa më të qetë dhe pa incidente, Balla ka kërkuar që drejtuesit e policisë të ‘harrojnë’ pushimet dhe të zbresin vetë në terren, për të marrë dhe zbatuar masat e duhura.