Arjan Gosa kishte pak javë që ishte kthyer nga Italia në Shqipëri. Ai jetonte dhe punonte si emigrant matanë Adriatikut, por vrasja e vëllait në sherrin me Altin Rexhën e riktheu në Kavajë. Burime të Top Neës pohojnë se pas ngjarjes së 29 marsit, ku mbetën të vdekur pas një sherri Armand Gosa dhe Altin Rexha, policia kishte vendosur nën mbikëqyrje të riun, për të shmangur ndonjë hakmarrje të mundshme. Mbikëqyrja ka zgjatur deri më datë 14 maj. Burimet thonë se aktualisht po hetohet në dy pista dhe që të dyja lidhen me hakmarrjen. E para është vrasja si hakmarrje për ngjarjen e 29 marsit ku mbeti i vrarë Armand Gosa pas shrrit me Altin Rexhën. Të dy ata vranë njëri-tjetrin pas një debati. Pista e dytë lidhet me një ngjarje të ndodhur 10 vite më parë, ku dy vëllezërit Armand dhe Arjan Gosa u përfshinë në një sherr me shtetasin Gentjan Gjuzi. Nga sherri, ky i fundit mbeti i plagosur rëndë dhe ndërroi jetë më pas në spital. Për këtë vrasje, Armand Gosa ndërroi edhe emrin në Edmond.