Lista e dëshmitarëve të thirrur nga Prokuroria e Posaçme në procesin gjyqësor në ngarkim të Plaurent Dervishaj dhe Julian Meçaj, të dyshuar për kryerjen e atentatit të 1 nëntorit të vitit 2019 ku mbeti i vrarë një person dhe të plagosur dy të tjerë, po shkon drejt fundit. Vullnet Muça, vëllai i Aleksandër Lahos që mbeti i plagosur në atentat, Beqir Boja pajtues gjaqesh si dhe Shaban Jaho pronar i një hoteli në Durrës ishin tre dëshmitarët që u paraqitën këtë të premte në GJKKO. I pyetur nga prokurori Adnan Xholi, Muça mohoi që familja e tij të kishte patur konflikte me ndonjë person, teksa shtoi se ende sot nuk e dinë arsyen e kryerjes së atentatit, pasi qoftë vëllai i tij Aleksandër Laho, por edhe familjarët nuk kishin patur mosmarrëveshje me ndonjë person. Ndërsa Beqir Boja tha se familjarët e Ramazan Rrajës i ishin betuar në Kuran se nuk kishin dijeni per ngjarjen. Sipas tii, Genc Maloku babai i të ndjerit Andi Maloku i premtoi se për një afat tremujor, nuk do merrte hak, derisa të qartësohej situata.