Kryebashkiaku i Tiranës, Erion Veliaj ka kallëzuar penalisht dy personat anonimë që shfaqen në dosjen e ngritur nga SPAK ndaj tij. Veliaj thotë në kallëzim se si Nesti Angoni, ashtu edhe Nasta Pëllumbi nuk ekzistojnë në regjistrat e gjendjes civile, por pavarësisht kësaj ata kanë firmosuar në dokumentet që kanë shërbyer si baza e hetimit penal që ka nisur SPAK ndaj tij. Në thelb të kallëzimit qëndron pretendimi se nuk kemi të bëjmë me një kallëzim anonim, por me një simulim të një kallëzuesi real, të materializuar me emër dhe nënshkrim, me qëllim krijimin e një besueshmërie artificiale përpara organit të akuzës. Veliaj thotë në kallëzim se kjo përbën jo vetëm falsifikim, por edhe një ndërhyrje të drejtpërdrejtë në mekanizmin e nisjes së ndjekjes penale, pasi mbi këtë bazë janë ndërmarrë veprime hetimore me pasoja konkrete juridike.