Kryebashkiaku Erion Veliaj në një nga takimet e zhvilluara në njësinë 7 të Tiranës, i është referuar emisionit të Top Story sa i përket përfitimeve të pafundme të deputetëve, përfshirë edhe kredinë e butë, duke i futur te kategoria e personave të pastrehë. Veliaj ka përmendur rastin e deputetit demokrat Oerd Bylykbashi duke iu referuar emisionit investigativ “Top Story”, ku Lulzim Basha si kryetar bashkie i dha një kredi të butë. “Ata janë në parti që i bëjnë llogaritë vetëm 1 për qind e popullsisë. Si do t’ia ulim taksat milionerëve, e ne themi se si do t’ia rrisim rrogat shumicës, 99% tjetër të popullsisë, se jemi këtu për shumicën. Të duhet një shtëpi, bashkia e Tiranës jep 1 mijë kredi të buta dhe propozimi i Edi Ramës është që kjo skemë të shtrihet në të 61 bashkitë. I mbani mend, edhe ata (PD) e bënë një herë këtë punën e kredive të buta. E patë në lajme, e patë dokumentarin (Top Story), deputeti, Oerd Bylykbashi, shtresë në nevojë, kredi e butë nga Lul Basha. Nënkryetari i Bashkisë, Eno Bozdo, shtresë në nevojë nga Lul Basha. Të gjithë zv/ministrat e tyre, me kredi të butë, shtresë në nevojë, i kap stresi shumë. Të gjithë drejtorët e tyre të përgjithshëm të PD shtresë në nevojë. Në Partinë Socialiste shtresë në nevojë është një djalë dhe një vajzë që krijojnë një familje e kanë një fëmijë dhe që kanë një punë dhe që duan të blenë shtëpinë e tyre pa interesa, sepse i paguan Partia Socialiste dhe qeveria e kryeministrit Edi Rama” Rastet e përfitimit të kredive të buta nga persona që gëzonin poste publike dhe nuk përmbushin kriteret, gjatë kohës që bashkia drejtohej nga Basha, janë bërë publike edhe më herët, ku mes përfituesve kanë qene ish këshilltarë bashkiakë apo edhe zv.ministra.