Kreu i Bashkisë së Tiranës, Erion Veliaj është ftuar në një takim nga Akademia Politike e Partisë Socialiste, ku iu përgjigj interesit të të rinjve në lidhje me suksesin dhe transformimin e kryeqytetit shqiptar përgjatë këtyre viteve. Veliaj theksoi se puna dhe reputacioni që gjithsecili lë pas, është kontribut për komunitetin dhe vendin që përfaqëson. “Një njeri që bën një punë të mirë, që lë një gjurmë, që lë një emër, që lë reputacion, e bën këtë jo vetëm për veten, por për të gjithë komunitetin dhe popullin që përfaqëson. Ti mund të jesh patriot kudo, mund të jesh i dobishëm për vendin tënd kudo, dhe kur mendoj se për 200 vjet, kolonia shqiptare në Aleksandri botonte një gazetë, libra, i dhanë Shqipërisë nga distanca të gjithë kontributin e tyre”. Kryebashkiaku ndau me të pranishmit edhe mbresat e vizitës së tij në Aleksandri. “Tirana dhe Aleksandria do të jenë Kryeqytetet Mesdhetare të Kulturës dhe Dialogut për vitin 2025, një vendim i marrë nga Unioni i Mesdheut, nga ministrat e Jashtëm të mbi 40 vendeve të Mesdheut”. Ai shtoi gjithashtu se puna me njerëzit është një ndër punët më sfiduese dhe më frymëzuese, për t’i dhënë formë një realiteti transformues në vend.