Një stuhi e rrezikshme dimërore ka përfshirë Shtetet e Bashkuara, duke lënë të paktën shtatë persona të vdekur. Mijëra persona raportohet të kenë mbetur pa energji elektrike. Shumë shkolla dhe rrugë nëpër SHBA janë mbyllur ndërsa mbi 11 mijë fluturime janë anuluar për shkak të kushteve “të rrezikshme për jetën”, sipas Shërbimit Kombëtar për Motin. Të paktën dy persona kanë vdekur si pasojë e hipotermisë në Luizianë dhe vdekje tjera të lidhura me stuhinë janë raportuar në Teksas, Tenesi dhe Kansas. Autoritetet kanë paralajmëruar se mund të ketë reshje të shumta bore dhe akull për disa ditë. Stuhia besohet se ka prekur mbi 180 milionë amerikanë, që do të thotë më shumë se gjysmën e popullsisë. Kryebashkiaku i Nju Jorkut, Zohran Mamdani tha përmes një postimi në X se të paktën tetë persona kanë humbur jetën të shtunën, por shkaqet nuk janë përcaktuar ende. Ekspertë të motit kanë paralajmëruar që një nga rreziqet më të mëdha të stuhisë është akulli, i cili mund të dëmtojë pemët, të këpusë kabllot e energjisë dhe t’i bëjë rrugët të pasigurta. Në Virxhinia dhe Kentuki, autoritetet kanë reaguar ndaj qindra aksidenteve rrugore. Kanadezët janë goditur gjithashtu nga reshjet e dendura të borës dhe qindra fluturime janë anuluar. Zyrtarët vlerësojnë se do të ketë 15-30 cm reshje bore në provincën e Ontarios.