Shtetet e Bashkuara të Amerikës dhe Izraeli nisën të shtunën një valë të gjerë sulmesh ajrore ndaj Iranit, duke shënjestruar zyrën e liderit Suprem, Ajatollahut Ali Khamenei, dhe zyrtarëve të tjerë të lartë në Teheran. Ky i fundit u kundërpërgjigj me sulme në të gjithë Lindjen e Mesme, përfshirë edhe dronë mbi Dubain. Duke folur për herë të parë, pas nisjes së sulmeve në Iran, Presidenti amerikan, Donald Trump, tha se operacioni ushtarak i nisur të shtunën mund të zgjasë, nëse Teherani nuk tërhiqet nga armët bërthamore. “Mund ta zgjas shumë këtë operacion dhe të marr gjithçka nën kontrollin tim, ose ta përfundoj për dy ose tri ditë dhe t’u them iranianëve: ‘Shihemi përsëri pas disa vitesh, nëse filloni të rindërtoni [programin tuaj bërthamor]’. Iranianët u afruan dhe pastaj u tërhoqën. Kuptova nga kjo se ata në të vërtetë nuk duan marrëveshje”, u shpreh kreu i Shtëpisë së Bardhë.