Një person i dënuar me masë mjekimi të detyruar ka ndërruar jetë në burgun e Lezhës. Sipas njoftimit zyrtar, gjatë ndërrimit të shërbimit, roja ka konstatuar se i dënuari Sotir Shabani, i shtrirë në krevat nuk po reagonte. Menjëherë është njoftuar mjeku i turnit, i cili, pas verifikimit, ka konfirmuar se pacienti kishte ndërruar jetë. Viktima, Sotir Shabani, ishte vendosur në burgun e Lezhës që prej datës 27 nëntor 2021, për veprën penale “Dhunë në familje”, me masë mjekimi të detyruar. Pas ngjarjes është hartuar dokumentacioni përkatës dhe janë njoftuar drejtuesit e institucionit, specialisti i Shërbimi i Kontrollit të Brendshëm të Burgjeve, Komisariati i Policisë Lezhë, si dhe Prokurori i gatshëm, për vijimin e procedurave ligjore. Autoritetet bëjnë me dije se institucioni po bashkëpunon me organet kompetente për sqarimin e plotë të rrethanave të këtij rasti.