Presidenti amerikan, Joe Biden, tha se ai nuk ishte aspak i habitur nga lajmi se Jevgeni Prigozhin, shef i grupit mercenar Vagner, mund të ketë vdekur në një aksident ajror në Rusi. “Nuk e di saktë se cfarë ka ndodhur por nuk jam aspak i habitur”, i tha ai gazetarëve. I pyetur më pas, nëse mendonte se Putin qëndronte pas vdekjes së tij, Biden tha: Ka shumë pak gjëra që ndodhin në Rusi, pas të cilave nuk qëndron Putin. Por unë nuk di mjaftueshëm për të dhënë një përgjigje për këtë pyetje Emri i Prigozhin ishte në listën e pasagjerëve të avionit që u rrëzua në veri perëndim të Moskës, sipas mediave ruse. Aksidenti ndodhi dy muaj pasi Prigozhin ndërmori një rebelim jetë shkurtër kundër Moskës, duke synuar rrëzimin e lidershipit ushtarak të vendit. Muajin e kaluar, në Helsinki, Biden me shaka, kishte paralajmëruar Prigozhinin, forca elitë e të cilit, Vagner, ka luajtur një rol të rëndësishëm në luftën në Ukrainë, se duhej të kishte kujdes pas rebelimit të tij të dështuar. “Nëse do të isha në vendin e tij do të kisha kujdes me atë që do të haja. Do ti mbaja sytë hapur tek munuja ime”, tha Biden.