Nën tavanin me afreske dhe ikonat e arta të Katedrales së Krishtit Shpëtimtar në Moskë, qindra njerëz u ngjeshën në sallë ndërsa priftërinjtë këndonin lutje për të vdekurit. Ata ishin mbledhur për t'i dhënë lamtumirën Stanislav Orlov, i njohur me nofkën e luftës “spanjolli’, themeluesi i njësisë ekstremiste Espanjola, një formacion i përbërë nga huliganë futbolli dhe vullnetarë neonazistë që luftuan si një forcë paraushtarake në anën e Rusisë në Ukrainë. Kanalet ruse pro-luftës në Telegram e paraqitën funeralin si një akt nderimi. Megjithatë, mes solemnitetit, një detaj mungonte. Nuk u përmend asnjë shkak zyrtar i vdekjes, një heshtje që vetëm sa nënvizoi shqetësimin që rrethonte ditët e fundit të Orlovit. Për më shumë se dy javë, vdekja e Orlov, e cila u përfol për herë të parë në internet më 9 dhjetor, ishte objekt spekulimesh. Faqet ruse të lajmeve dhe mediat e pavarura shpejt raportuan se Orlov nuk u vra në fushën e betejës në Ukrainë, por ai u zu në pritë dhe u qëllua në shtëpinë e tij në Krimenë e aneksuar nga Rusia nga shërbimet e sigurisë të vetë Moskës. Astra, një media që vepron në azil, publikoi pamje nga kamerat e sigurisë që tha se tregonin momentet para se të vritej Orlov, me një grup ushtarakësh të armatosur rusë që mbërrinin jashtë shtëpisë së tij, të ndjekur nga zhurma e të shtënave me armë zjarri. Një ambulancë mbërriti për të marrë trupin e Orlov vetëm gjashtë orë më vonë. Analistët thonë se vdekja e Orlov pasqyron një goditje më të gjerë dhe gjithnjë e më të dukshme nga Kremlini ndaj figurave ultranacionaliste renegate dhe grupeve të armatosura gjysmë-autonome si rezultat i kryengritjes së Ëagnerit. Gjatë pjesës më të madhe të pushtimit të Vladimir Putinit, shteti rus toleroi dhe nganjëherë inkurajoi, formacionet radikale që mund të mobilizonin luftëtarët shpejt. Njësi të tilla si Española ishin të dobishme ushtarakisht dhe ideologjikisht, duke mishëruar një patriotizëm të papërpunuar, të nivelit të rrugës, që plotësonte propagandën zyrtare. Española - e sanksionuar nga Mbretëria e Bashkuar dhe BE - mori pjesë në disa nga sulmet më të përgjakshme të Rusisë në Ukrainë, duke përfshirë betejat për Mariupolin dhe Bakhmutin. Por toleranca për njësitë e parregullta që vepronin jashtë zinxhirit kryesor të komandës, siç është Española, u ngushtua ndjeshëm pas qershorit 2023, kur grupi mercenar Ëagner i Yevgeny Prigozhin u rebelua, duke pushtuar për pak kohë një seli ushtarake dhe duke nisur një kolonë të armatosur drejt Moskës. Edhe pse rebelimi dështoi brenda disa orësh, ai shënoi sfidën më serioze ndaj sundimit të Putinit në dekada. Dy muaj më vonë, Prigozhin u vra në një rrëzim avioni që u pa gjerësisht nga zyrtarët perëndimorë si një hakmarrje e urdhëruar nga Kremlini. Që atëherë, aparati i sigurisë së Rusisë ka lëvizur sistematikisht për të rivendosur kontrollin.