Prokuroria Speciale e Republikës së Kosovës thotë se në koordinim me Policinë po vijon intensivit hetimet lidhur me varrezat masive të zbuluara në Zubin Potok. Deri më tani, prokuroria thotë se tre persona janë arrestuar nën dyshimin për kryerjen e veprës penale "Krime lufte kundër popullsisë civile". Gjatë hetimeve janë kontrolluar disa lokacione. Në fshatin Jabukë janë gjetur mbetje të cilat do t'i nënshtrohen ekzaminimeve mjeko-ligjore dhe analizave të ADN-së për identifikim, ndërsa gërmimet në fshatin Kalludër e Vogël po vazhdojnë. Aktualisht, hetimet po vazhdojnë në një lokacion të tretë. Prokurorja përgjegjëse ishte në vendngjarje së bashku me hetuesit nga Drejtoria për Hetimin e Krimeve të Luftës dhe ekspertët forensikë për të mbikëqyrur veprimet hetimore. Për shkak të fazës së ndjeshme të hetimit, Prokuroria Speciale thotë se nuk mund të japë informacione të mëtejshme në këtë moment. Eshtrat e gjetura dyshohet se janë të një grupi intelektualësh shqiptarë të zhdukur gjatë periudhës së luftës ndaj pushtuesve serbë.