Në Gjykatën Themelore në Prishtinë është mbajtur seanca fillestare ndaj dy të akuzuarve serbë, të arrestuar si të dyshuar në lidhje me varrezën masive të zbuluar në fshatin Kalludër të Zubin Potokut. Zëdhënësja e Prokurorisë Speciale të Kosovës, Arbnora Luta, konfirmoi se gjatë seancës pritet të shqyrtohet kërkesa për caktimin e masës së paraburgimit ndaj dy të dyshuarve. Në zonën ku po zhvillohen gërmimet, u gjetën mbetje mortore dhe veshmbathje që dyshohet se u përkasin 23 intelektualëve të zhdukur nga Mitrovica. Prokuroria Speciale ka bërë të ditur se operacioni për zhvarrosjen, autopsinë dhe identifikimin e mbetjeve mortore po zhvillohet me urdhër të Gjykatës Themelore në Prishtinë. Në vendngjarje ndodhen ekipet e Policisë së Kosovës, Institutit të Mjekësisë Ligjore, si dhe zyrtarë të EULEX-it, të cilët po ofrojnë siguri gjatë procesit. Ndërkohë, antropologët forenzikë vijojnë gërmimet dhe ekzaminimet për identifikimin e mbetjeve. Autoritetet nuk kanë bërë ende publike detaje të tjera mbi identitetin e viktimave apo rrethanat e plota të operacionit.