Është konfirmuar prania e mbetjeve mortore edhe në lokacionin e tretë të dyshuar për varrezë masive në komunën e Zubin Potokut. Lajmi është bërë i ditur përmes një komunikate të përbashkët të Prokurorisë Speciale të Republikës së Kosovës dhe Policisë së Kosovës. “Në këtë lokacion janë duke u zhvilluar ekzaminimet dhe procedurat e nevojshme hetimore, në koordinim të plotë ndërmjet Prokurorisë Speciale dhe Policisë së Kosovës, dhe institucioneve të tjera kompetente, me qëllim zbardhjen e të gjitha rrethanave”, thuhet në komunikatë. Ky është lokacioni i tretë në komunën e Zubin Potokut ku është konfirmuar prania e mbetjeve mortore pas dyshimeve për ekzistencën e një varreze masive. Në lokacionet e identifikuara më herët janë zhvilluar kërkime dhe ekzaminime nga institucionet kompetente, në kuadër të përpjekjeve për zbardhjen e fatit të personave të zhdukur gjatë luftës së fundit në Kosovë. Mbetjet e gjetura në lokacionin e tretë do t’i nënshtrohen procedurave të mëtejshme forenzike, me qëllim identifikimin e tyre dhe përcaktimin e rrethanave. Çështja e personave të zhdukur dhe gjetja e lokacioneve të dyshuara për varreza masive mbetet një prej çështjeve të pazgjidhura që lidhen me periudhën e luftës në Kosovë.