Varianti i ri shumë ngjitës i koronavirusit, i cili për herë të parë është identifikuar në Mbretërinë e Bashkuar, është pikasur tani edhe në Shtetet e Bashkuara, Indi dhe Amerikën Latine. Konfirmimet e fundit e çojnë në së paku 20 numrin e vendeve në Evropë, Azi dhe Lindje të Mesme, që kanë raportuar infektime me variantin e ri. Në SHBA, rasti i parë i konfirmuar vjen nga shteti i Kolorados. Ai është një i ri rreth të 20-tave, pa histori udhëtimi – gjë që sugjeron se varianti mund të ketë prani të lartë në komunitet. Zyrtarët shëndetësorë thanë se ata po punojnë për të identifikuar kontaktet e mundshme të variantit të ri. Mutacionet e virusit janë normale dhe shkencëtarët thonë se ky variant nuk besohet të jetë më vdekjeprurës ose të shkaktojë infeksione më të rënda. Po ashtu, nuk pritet që ai të jetë rezistent ndaj vaksinave. Shkencëtarët në Mbretërinë e Bashkuar, megjithatë, thonë se ky variant është më ngjitës. Për shkak të transmetueshmërisë më të lartë, agjencia shëndetësore e BE-së ka paralajmëruar për rrezikun e më shumë shtrimeve në spitale. Një tjetër variant në Afrikën e Jugut ka shkaktuar tashmë alarm atje dhe po kontribuon në rritjen e rasteve. SHBA ka regjistruar më shumë se 19 milionë infektime dhe mbi 337 mijë viktima nga koronavirusi, shifra më e lartë në botë. Në të gjithë botën, koronavirusi ka prekur rreth 82 milionë njerëz. Prej tyre, mbi 1.7 milion pacientë kanë vdekur dhe mbi 46 milionë janë shëruar. Në Evropë, Franca kryeson për sa i takon numrit të rasteve, mbi 2.6 milionë, ndërsa Italia për sa i takon numrit të viktimave, mbi 73,000.