Top News – Vangjush Dako mbetet në burg / Seancë maratonë në GJKKO, ish-kryebashkiaku mohon akuzat

Gjykata e Posaçme vleftësoi akuzën e shpërdorimit të detyrës në dy raste të ngritur nga SPAK ndaj ish kryebashkiakut të Durrësit, Vangjush Dako dhe caktoi ndaj tij masën e sigurisë arrest me burg. E njëjta masë u la edhe për 7 të akuzuarit e tjerë, ndërsa arrest shtëpia u caktua për Ardian Blukun dhe detyrim paraqitje për Diana Dedjan. Masat e sigurisë janë ekzekutuar për shtatë persona, ndërsa tre të tjera, më konkretisht Adhurim Qehajaj, Ermal Lama dhe Fatmir Ejupi janë ende në kërkim. Dako doli përpara trupës gjykuese këtë të enjte. Ai ka mohuar akuzat e ngritura nga Prokuroria e Posaçme Antikorrupsion dhe dha sqarime lidhur me tenderin për blerjen e projektit për zhvillimin e vijës bregdetare, nga zona e Brrylit deri në Currila, me pretendimin se nuk ka patur dijeni dhe se gjithcka ka qenë në dorën e specialistëve.