Ushtria izraelite lëshoi urdhra të rinj evakuimi për banorët në zonat e një periferie të qytetit lindor të Gazës, duke shkaktuar një valë të re zhvendosjesh të dielën dhe një drejtor i spitalit të Gazës u plagos në një sulm izraelit me dron, thanë mjekët palestinezë. Urdhrat e rinj për periferinë Shejaia të lëshuar të shtunën në mbrëmje, fajësojnë militantët palestinezë që kanë lëshuar raketa nga kjo zonë në veri të Rripit të Gazës. “Për sigurinë tuaj, ju duhet të evakuoheni menjëherë drejt jugut”, thuhet në postimin e ushtrisë. Breshëri me raketa të shtunën u lëshuan nga krahu i armatosur i Hamasit, i cili tha se kishte shënjestruar një bazë të ushtrisë izraelite në kufi. Pamjet që qarkulluan në mediat sociale dhe ato palestineze, tregonin banorët që largoheshin nga Shejaia me karroca me gomerë dhe mjete të tjera, e mes tyre edhe fëmijë që mbanin çanta shpine, duke ecur në këmbë.