Kreu i Organizatës Botërore të Shëndetësisë (OBSH), Tedros ka paralajmëruar se temperaturat ekstreme mund të jenë përgjegjëse për 1.300 vdekje shtesë në Evropë, të regjistruara që nga 21 qershori. Ai tha se kontinenti I Evropës, është ai që po ngrohet më shpejt në botë, me ritëm dy herë më të lartë se mesatarja globale. Sipas tij, 150 milionë njerëz po jetojnë nën ndikimin e vapës ekstreme, ku qindra kanë humbur jetën, shkollat janë mbyllur dhe rrjetet energjetike po mbingarkohen. Javën e kaluar, në Gjermani, Poloni dhe Çeki, janë thyer rekordet e temperaturave, duke arritur ose tejkaluar 40 gradë Celsius. Autoritetet çeke u kanë bërë thirrje qytetarëve të shmangin aktivitetin fizik, ndërsa në Gjermani, janë reduktuar udhëtimet me tren dhe ai I tramvajve. Policia e Berlinit përdori topa uji për të ndihmuar banorët e kryeqytetit të freskoheshin.