Franca, Spanja, Gjermania dhe Greqia janë mes vendeve evropiane që po regjistrojnë rritje të ndjeshme të rasteve të koronavirusit duke shtuar frikën e një vale të dytë infektimesh gjatë sezonit të pushimeve. Franca, shtoi edhe 1695 raste të reja koronavirusi në 24 orët e shkuara, shifra ditore më e lartë kjo në më shumë se dy muaj duke e cuar totalin në 228576. Numri i pacientëve me koronavirus në spitale dhe njësitë e kujdesit intensiv është ulur në 24 orët e shkuara sipas të dhënave të agjencisë së shëndetit ndërsa në total, numri i viktimave në vend ka shkuar në 30305. Në Spanjë po ashtu, pati 1772 infektime të reja 24 orët e shkuara, çka e çoi totalin e rasteve në 305767. Ndërkohë në Greqi, 124 raste shtesë u pikasën 24 orët e shkuara, duke e çuar numrin e përgjithshëm të infektimeve në vend në 4973.