Një analizë e re nga Organizata Botërore e Shëndetësisë riafirmoi se nuk ka lidhje midis vaksinave dhe autizmit, në kundërshtim me teoritë që përhapen në Shtetet e Bashkuara. Qendrat e SHBA-së për Kontrollin dhe Parandalimin e Sëmundjeve muajin e kaluar rishikuan faqen e tyre të internetit me një gjuhë që minon qëndrimin e tyre të mëparshëm, të bazuar shkencërisht, se imunizimet nuk shkaktojnë çrregullimin zhvillimor të autizmit. Vite të tëra kërkimesh tregojnë se nuk ka lidhje shkakësore mes vaksinimeve dhe autizmit ose çrregullimeve të tjera neurozhvillimore. Por Robert Kennedy Jr, shefi i shëndetësisë së vendit, ka shprehur prej kohësh një retorikë antivaksinë dhe ka lëshuar pretendime të pasakta që i lidhin të dyja. Shefi i OBSH-së, Tedros Adhanom Ghebreyesus, tha në një konferencë për shtyp në Gjenevë se autizmi nuk ishte një efekt anësor i vaksinave. "Sot, OBSH po publikon një analizë të re nga Komiteti Këshillimor Global për Sigurinë e Vaksinave që ka gjetur, bazuar në provat e disponueshme, se nuk ka lidhje shkakësore midis vaksinave dhe autizmit", tha shefi i agjencisë shëndetësore të OKB-së. Komiteti shqyrtoi 31 studime në vende të shumta gjatë 15 viteve në lidhje me vaksinat. "Komiteti arriti në përfundimin se provat nuk tregojnë lidhje midis vaksinave dhe autizmit, duke përfshirë vaksinat që përmbajnë alumin ose tiomersal," tha Tedros. "Ky është studimi i katërt i këtij lloji, i provave, pas shqyrtimeve të ngjashme në 2002, 2004 dhe 2012. Të gjitha studimet arritën në të njëjtin përfundim: vaksinat nuk shkaktojnë autizëm. "Ashtu si të gjitha produktet mjekësore, vaksinat mund të shkaktojnë efekte anësore, të cilat OBSH i monitoron. Por autizmi nuk është një efekt anësor i vaksinave", tha shefi i OBSH-së duke shtuar: "Vaksinat janë ndër shpikjet më të fuqishme dhe transformuese në historinë e njerëzimit. Vaksinat shpëtojnë jetë nga rreth 30 sëmundje të ndryshme, duke përfshirë fruthin, kancerin e qafës së mitrës, malarien dhe të tjera".