Qeveria e Kosovës po zhvillon negociata për sigurimin e vaksinës kundër COVID-19 "në rast se miratohet një e tillë". Lajmin e konfirmoi ministri i Shëndetësisë, Armend Zemaj I cili nuk përmendi se me cilën kompani janë në diskutime duke sqaruar se këto janë “ informacione të brendshme të ministrisë së drejtuar prej tij dhe ekzekutivit”. "Jemi në hapa konkretë, një lëvizje të tillë e mëndojmë të realizueshme nëse vaksina nxirret në përdorim që edhe ne ta sigurojmë për të gjithë qytetarët e Republikës së Kosovës, pavarësisht cmimit”, tha Zemaj. Ai premtoi se vaksinimi për qytetarët e Kosovës do të jetë falas. Më herët zyrtarë të Ministrisë së Shëndetisë thanë për REL se Prishtina kishte nisur negociatat me partnerët ndërkombëtarë që veprojnë në fushën e shëndetësisë si, Agjencinë për Fëmijë të Kombeve të Bashkuara (UNICEF) dhe Organizatën Botërore të Shëndetësisë (OBSH) për ta siguruar vaksinën kundër koronavirusit, në momentin kur ajo të prodhohet dhe kualifikohet për përdorim te njerëzit. OBSH i ka bërë thirrje shteteve që t’i bashkohen një pakti global që synon të garantojë se edhe vendet më pak të pasura do të kenë qasje tek vaksinat e koronavirusit, duke paralajmëruar nga rreziqet e të ashtuquajturit “nacionalizëm për vaksina”.