Aktivistët në Gjeorgji penguan një dasmë që po zhvillohej jashtë kryeqytetit Tbilisi, ku mendohet se po merrte pjesë vajza e ministrit të Jashtëm të Rusisë. Sipas raporteve nga mediat gjeorgjiane, Yekaterina Lavrov, vajza e Sergei Lavrov, do të merrte pjesë në një festë pas dasmës, në një resort malor në lindje të Tbilisit. Dasma, duket se ishte ajo e vëllait të Aleksandr Vinokurov, që është bashkëshorti i Yekaterina Lavrov. Protestuesit nacionalistë organizuan një tubim jashtë resortit, duke u përplasur madje edhe me policinë, e cila arrestoi të paktën 16 persona. Sipas raportimeve të mediave, disa protestues hodhën vezë mbi minibusët që dilnin nga hoteli, duke thirrur: "Rusët nuk kanë vend në Gjeorgji!" Presidentja e Gjeorgjisë Salome Zurabishvili tha se ceremonia u anulua, dhe se të ftuarit e dasmës tashmë ishin larguar nga resorti. Zurabishvili tha gjithashtu se një ligjvënës rus kishte marrë pjesë në ceremoni.