Ushtria izraelite tha të enjten se një sulm ajror vrau katër militantë në zonën Jenin të Bregut Perëndimor të pushtuar. Jenin është një bastion i grupeve militante palestineze që luftojnë Izraelin dhe ka qenë në qendër të bastisjeve ushtarake izraelite në shkallë të gjerë të nisura në fund të gushtit që ministria palestineze e shëndetësisë thotë se kanë vrarë dhjetëra civilë. "Pak kohë më parë, (Forcat e Mbrojtjes së Izraelit) goditën terroristët e armatosur që vepronin brenda një automjeti në zonën e Qabatiya në Jenin, si pjesë e një operacioni kundër terrorizmit," tha ushtria në një deklaratë për AFP. Forcat izraelite kanë arrestuar gjithashtu dhjetëra palestinezë ndërsa janë shkatërruar shumë objekte nga operacionet që po kryehn në zonë. Operacionet e mëdha izraelite në Bregun Perëndimor po ndodhin "në një shkallë të padëshmuar në dy dekadat e fundit", tha shefi i Kombeve të Bashkuara për të drejtat e njeriut, Volker Turk i cili kërkoi ulje të tensioneve. Dhuna në Bregun Perëndimor është rritur së bashku me luftën në Gaza e cila filloi pasi Hamasi sulmoi Izraelin më 7 tetor. Izraeli e ka pushtuar Bregun Perëndimor që nga viti 1967 dhe forcat e tij bëjnë rregullisht inkursione në komunitetet palestineze, por bastisjet aktuale si dhe komentet e zyrtarëve izraelitë shënojnë një përshkallëzim, thonë banorët.