Trembëdhjetë njerëz u vranë në një operacion izraelit në Sirinë jugore të premten, raportuan mediat shtetërore. Ushtria izraelite tha se gjashtë ushtarë u plagosën , nga të shtënat e militantëve gjatë operacionit në fshatin Beit Xhin. Tre prej tyre mësohet se janë në gjendje të rëndë. Operacioni u shndërrua në një nga më të përgjakshmit për shkak të numrit të viktimave që nga rrëzimi i presidentit Bashar al-Assad një vit më parë. Izraeli ka rritur intensitetin e operacioneve ushtarake në Siri që nga rënia e Assadit, me pretendimin se militantët po strehohen përgjatë kufirit. Ushtria izraelite tha se trupat e saj kishin ndërmarrë një operacion për të arrestuar persona të dyshuar si anëtarë të Jama'a Islamiya – një grup islamist libanez që shkrepi raketa drejt Izraelit nga Libani gjatë luftës në Gazë – duke i akuzuar ata për përfshirje në “komplote terroriste”. Por aksioni u shndërua në një përleshje të dhunshme pasi banorët u përballën me ushtrinë. Agjencia shtetërore siriane e lajmeve SANA, e cila raportoi për 13 të vrarë dhe dhjetëra të plagosur, tha se forcat izraelite bombarduan Beit Xhinin në orën 3:40 të mëngjesit. Ndërkohë ushtria izraelite tha se “terroristë të armatosur” qëlluan mbi trupat e saj, dhe ata u përgjigjën me zjarr, të ndihmuar “nga mbështetja ajrore”. Zëdhënësi i ushtrisë izraelite, Avichay Adraee, tha se Izraeli nuk do të lejojë “terrorizmin dhe elementet terroriste të nguliten në kufijtë tanë”, dhe se tre persona të dyshuar “për përfshirje në komplote terroriste” u arrestuan të premten.