Sekretari amerikan i Mbrojtjes, Pete Hegseth tha se ushtria amerikane është e gatshme të zbatojë çdo vendim që presidenti Donald Trump mund ta marrë në lidhje me Iranin duke lënë të kuptohet se qëllimi i SHBA-së mund të bëhet më i qartë në ditët në vijim dhe duke mos përjashtuar mundësinë e një sulmi drejt Teheranit. Në dëshminë e dhënë para komitetit të Senatit, Hegseth ishte shumë i kujdesshëm në deklaratat e tij, duke mos pranuar të thotë nëse Pentagoni është gati për të sulmuar Iranin apo jo. Por pranoi që ushtria është gati të veprojë nëse Trump do të jap urdhrin. "Ata duhet të kishin bërë marrëveshje, fjala e presidentit Trump ka peshë. Bota e kupton këtë. Dhe, në Departamentin e Mbrojtjes, puna jonë është të jemi gati dhe të përgatitur me opsione – dhe pikërisht këtë po bëjmë", tha Hegseth para Komitetit të Forcave të Armatosura të Senatit. Më herët Trump tha se i ishte sosur durimi me Iranin, por nuk dha nuk dha një përgjigje të drejtë nëse do të sulmojë apo jo Teheranin. “Mund ta bëj, mund të mos e bëj. Dua të them, askush nuk e di çfarë do të bëj”, u tha Trump gazetarëve.