Teksa lufta në Lindjen e Mesme vijon të tensionojë tregjet globale dhe të rrisë çmimet e naftës, Kina po përpiqet të marrë rolin e paqebërësit. Presidenti Xi Jinping ka mbështetur, së bashku me Pakistanin, një plan për armëpushim dhe rihapjen e Ngushticës së Hormuzit, rruga kyçe për furnizimin botëror me naftë. Sipas analizës së “BBC” lëvizja e Pekinit lidhet drejtpërdrejt me interesat e veta ekonomike. Si importuesja më e madhe e naftës në botë, Kina kërkon të shmangë një krizë të gjatë energjetike që do të godiste industrinë, eksportet dhe zinxhirin global të furnizimit. Pekini ka ndërtuar prej vitesh marrëdhënie të forta si me Iranin, ashtu edhe me vendet arabe të Gjirit, duke përdorur peshën ekonomike si instrument ndikimi. Kjo i jep mundësi të paraqitet si palë ndërmjetëse, ndonëse pa fuqinë ushtarake që kanë SHBA-të në rajon. Megjithatë, suksesi i kësaj nisme mbetet i paqartë. Pa një reagim të drejtpërdrejtë nga Uashingtoni dhe Teherani, plani rrezikon të mbetet më shumë një lëvizje diplomatike për imazh. Në thelb, Kina po kërkon stabilitet, jo vetëm për paqen në rajon, por për të mbrojtur ekonominë e saj dhe për të forcuar profilin si fuqi globale pragmatike.