Presidenti amerikan Donald Trump ka krijuar pasiguri për të ardhmen e SHBA-ve në NATO, duke lënë të kuptohen se mund të largohet nga aleanca pas luftës me Iranin. Në një intervistë për mediat britanike, ai kritikoi ashpër mungesën e mbështetjes ushtarake nga vendet anëtare. Trump u shpreh se nuk ka pasur kurrë besim të plotë te NATO, duke e cilësuar atë si të dobët dhe pa ndikim real. Sipas tij, edhe Rusia e sheh aleancën në të njëjtën mënyrë, gjë që e bën situatën edhe më problematike për sigurinë ndërkombëtare, ndërsa e konsideroi aleancën si një tigër prej letre. Këto deklarata vijnë në një moment kur vendet e NATO-s kanë hezituar të përfshihen në konflikt, veçanërisht për rihapjen e Ngushticës së Hormuzit, një rrugë jetike për transportin e naftës që aktualisht ndodhet nën presionin e Iranit. Deklaratat e Trump shtojnë tensionet mes SHBA-ve dhe aleatëve të saj, duke ngritur pikëpyetje serioze për të ardhmen e bashkëpunimit brenda NATO-s dhe rolin e saj në krizat globale.