Zyrtarët ushtarakë amerikanë po hartojnë plane të reja për të goditur aftësitë e Iranit në Ngushticën e Hormuzit në rast se armëpushimi aktual me rrëzohet, sipas burimeve të shumta të njohura me çështjen. Opsionet që po merren në konsideratë, përfshijnë sulme me një fokus të veçantë në "shënjestrimin dinamik" të aftësive të Iranit rreth Ngushticës së Hormuzit, Gjirit jugor Arabik dhe Gjirit të Omanit, thanë burimet, duke përshkruar sulme të mundshme kundër anijeve të vogla sulmuese të shpejta, anijeve minuese dhe aseteve të tjera që e kanë ndihmuar Teheranin të mbyllë në mënyrë efektive ato rrugë ujore kyçe dhe t'i përdorë ato si levë mbi SHBA-në. Kjo mbyllje ka shkaktuar probleme të mëdha në ekonominë globale, duke kërcënuar të minojë përpjekjet e Presidentit Donald Trump për të ulur inflacionin në SHBA dhe ka ndodhur pavarësisht një armëpushimi që ka ndaluar sulmet amerikane. Ndërsa ushtria ka shënjestruar Marinën e Iranit, pjesa më e madhe e bombardimeve, në muajin e parë, u përqendrua në objektiva larg ngushticës që do t'i lejonin ushtrisë amerikane të godiste më tej brenda vetë Iranit. Planet e reja kërkojnë një fushatë shumë më të përqendruar bombardimi rreth rrugëve ujore strategjike. CNN ka raportuar më herët se një përqindje e madhe e raketave mbrojtëse të vendit mbeten të paprekura. Irani gjithashtu ka shumë anije të vogla që mund të përdoren si platforma për të nisur sulme ndaj anijeve, duke i komplikuar përpjekjet e SHBA-së për të hapur ngushticën. Ushtria amerikane gjithashtu mund të ndjekë kërcënimin e mëparshëm të Trump për të goditur objektiva me përdorim të dyfishtë dhe infrastrukturë, duke përfshirë objektet e energjisë, në një përpjekje për ta detyruar Iranin të ulet në tryezën e negociatave.