Ministria turke e mbrojtjes tha të enjten se një armëpushim mes Ukrainës dhe Rusisë duhet të arrihet përpara se të zhvillohen diskutime mbi vendosjen e mundshme të trupave për një forcë të mundshme sigurie. Të martën, Presidenti francez Emmanuel Macron tha se forca ndërkombëtare që do të vendoset në Ukrainë pas një marrëveshjeje të mundshme paqeje, do të ketë ushtarë francezë, britanikë dhe turq. Ankaraja, e cila ka mbajtur lidhje të përzemërta si me Moskën ashtu edhe me Kievin gjatë luftës, ka thënë se është e hapur për të diskutuar një vendosje të tillë, por vetëm nëse përcaktohen modalitetet e saj. "Së pari, duhet të vendoset një armëpushim mes Rusisë dhe Ukrainës. Më pas, duhet të vendoset një kuadër misioni me një mandat të qartë dhe duhet të përcaktohet masa në të cilën secili vend do të kontribuojë", tha ministria në një konferencë për shtyp kur u pyet për komentet e Macron. Sipas Macron, ushtarët nga franca, britania e turqia mund të dërgohen në ukrainë si pjesë e forcës së sigurisë, në ditën e nënshkrimit të paqes. Ato do të vendosen në zona të prapavijës si Kievi apo Odesa, për të ofruar siguri dhe trajnim, duke shërbyer kështu si një nga garancitë e sigurisë për ukrainën, pas luftës. Vendosja në Ukrainë nuk do të kryhet sipas kuadrit të NATO-s, por si pjesë e një "koalicioni ndërqeveritar", tha Macron. "Ne kemi rreth 20 vende që tashmë kanë thënë se çfarë janë gati të bëjnë, qoftë në ajër, në tokë apo në det", tha presidenti francez. Rusia ndërkohë ka refuzuar vazhdimisht praninë e trupave të NATO-s në territorin ukrainas si pjesë e çdo marrëveshjeje paqeje.