Teksa Rusia vazhdon të tërheqë trupat nga Siria, po perballet me sfidat në rritje të evakuimit, pasi ushtarëve u mungon ushqimi dhe uji i pijshëm. Sipas asaj që raportojnë mediat e huaja, Drejtoria Kryesore e Inteligjencës e Ukrainës ka deklaruar se kjo sfidë vjen pasi tërheqja e trupave ruse nga zonat e thella të Sirisë vazhdon. Ministria e Jashtme ruse tha në Telegram se kishte evakuuar një pjesë të personelit të saj diplomatik nga Siria më 15 dhjetor. Avionët transportues rusë janë larguar nga baza ajrore Hmeimim në ditët e fundit si pjesë e evakuimit pas rrëzimit të liderit sirian, Bashar al-Assad. Assad u largua drejt Rusisë, që ishte mbështetësja kryesore e regjimit të tij. Pamje satelitore të marra më 13 dhjetor nga kompania e teknologjisë hapësinore Maxar duket se tregonin që Rusia po përgatitej për tërheqjen e pajisjeve ushtarake nga baza ajrore Hmeimim. Radio Evropa e Lirë raporton se Rusia gjithashtu ka dërguar disa anije në Siri. Në Damask, HTS-ja ka emëruar një qeveri të përkohshme, dhe lideri i saj, Riad al-Asaad, foli për AFP-në i bindur se forcat që ndihmuan në rrëzimin e Assadit do të bashkohen si një forcë e vetme.