Gjatë një aksioni të enjten, në qytetin Qabatiya, në bregun e okupuar perëndimor, disa ushtarë izraelitë janë filmuar teksa shtynin tre trupa, në dukje të pajetë, nga catia. Episodi, i cili tani po hetohet nga ushtria, është i fundit në një seri shkeljesh të supozuara nga ana e forcave izraelite që nga fillimi i luftës me hamasin, që sipas grupeve për të drejtat e njeriut dëshmojnë një përdorim të tepruar të forcës ndaj palestinezëve. Sipas të përditshmes izraelite haaretz, ushtria ka deklaruar se bëhet fjalë për një incident të rëndë që bie ndesh me vlerat tona, duke shtuar se incidenti është në fazë hetimi. Agjencitë e huaja të lajmeve, nuk kanë mundur të konfirmojnë menjëherë identitetin apo vendndodhjen e trupave të hedhur nga catia, dhe as numrin total të viktimave si pasojë e aksionit izraelit në qytet, të enjten. Izraeli tha se trupat e tij kishin vrarë shtatë militantë të enjten, mes të cilëve katër në shkëmbime zjarri në terren dhe tre në një sulm ajror mbi një makinë me militantë që kishin hapur më herët zjarr mbi trupat. Sipas ligjit ndërkombëtar, ushtarët duhet të sigurohen që trupat e pajetë, përfshirë ata të luftëtarëve armiq, të trajtohen me dinjitet. Kur tërhiqen nga operacionet e tyre, ushtarët izraelitë zakonisht lënë pas cdo palestinez të vrarë në luftime. Rrallë herë ushtria i merr trupat e pajetë në izrael. “Nuk ka asnjë nevojë ushtarake për ta bërë këtë. Është vetëm një mënyrë mizore e trajtimit të trupave të palestinezëve”, tha Shaun Jabarin, drejtor i grupit palestinez të të drejtave të njeriut, Al Haq, pas publikimit të pamjeve. Ndërsa vëmendja e botës është fokusuar tek lufta shumë më vdekjeprurëse në gaza, dhjetëra palestinezë janë vrarë, plagosur dhe arrestuar në bregun perëndimor, ku ushtria izraelite ka muaj që kryen operacione. Mbi 700 palestinezë në bregun perëndimor janë vrarë nga zjarri izraelit që kur lufta në gaza nisi, më 7 tetor, sipas ministrisë palestineze të shëndetësisë. Pjesa veriore e bregut perëndimor ka parë dhunën më të rëndë që nga fillimi i luftimeve.