Në mesazhin e urimit për Vitin e ri 2021, kreu i Partisë Demokratike Lulzim Basha u kërkon shqiptarëve të mendojnë se ditë më të mira na presin dhe të largojnë për disa çaste trishtimin e këtij viti që lamë pas. Mendoni se ditë më të mira na presin, se një e ardhme më e ndritur është përpara nesh. Një mesazh të veçantë dua t’ju percjell në këtë fundvit të rinjve dhe të rejave që nga dëshpërimi i pamundësisë presin shansin e parë per t’u larguar. Mos e humbisni kurrë shpresën! Mos u dorëzoni! Asnjëherë mos hiqni dorë nga qëllimet, nga ëndrrat tuaja, sepse një ditë dhe kjo ditë nuk do të jetë e largët, do të gjeni rrugën e suksesit. Duke iu referuar goditjeve të papritura që na solli ky vit që po lëmë pas, kreu i demokratëve ka inkurajuar shqiptaret se “gjithsesi ka shpresë”. “Shpresë dhe besim për një të ardhme më të mirë, të cilën e kemi vetë në dorë. Ka shpresë për një Shqipëri tjetër. Për një qeverisje ndryshe që kujdeset për qytetarët e punon për ju. Për një qeveri që garanton uljen e kostos së jetës dhe mundëson hapjen e vendeve të reja të punës për çdo qytetar. Ka shpresë për ndryshim dhe gjithçka varet prej nesh për ta bërë atë shpresë realitet. Unë jam plot besim që ndryshimi është i mundur dhe nuk do të ngelet vetëm shpresë”. Gëzuar Vitin e Ri të gjithëve! Zoti ju bekoftë ju dhe familjet tuaja!