Qeveria e Italisë është e gatshme të japë miratimin përfundimtar për projektin multi-miliarda eurosh për të ndërtuar një urë që lidh Siçilinë me pjesën kontinentale të vendit, duke hapur rrugën për fillimin e punimeve pas dekadash diskutime. Ndërtimi i urës prej 3.6 km, e parashikuar të jetë një nga më të gjatat në botë, është diskutuar që nga fundi i viteve 1960 për të ndihmuar në zhvillimin e jugut të varfër të Italisë. Qeveria e krahut të djathtë e kryeministres Giorgia Meloni e bëri atë një përparësi dhe ka ndarë 13.5 miliardë euro që do të përdoren gjatë 10 viteve të ardhshme për ndërtimin e urës dhe objekteve përreth. Mateo Salvini, kreu i Partisë Lega Nord dhe Ministri i Infrastrukturës, ka njoftuar se do të mbajë një konferencë për shtyp, përpara se të udhëtojë për në vendin ku do të ndërtohet ura. Projekti i Urës së Ngushticës së Mesinës iu dha konsorciumit Eurolink pas një tenderi ndërkombëtar. Kompania më e madhe e ndërtimit në Itali, Ëebuild drejton konsorciumin, i cili përfshin gjithashtu grupin spanjoll Sacyr dhe grupin japonez IHI. Ura ka tërhequr kritika të ashpra nga ata që vënë në dyshim dobinë e ndërtimit të saj në një zonë të prekshme nga tërmetet dhe ata që thonë se do të ishte një humbje parash dhe e dëmshme për peizazhin, mes frikës se Cosa Nostra dhe Ndrangheta, me bazë në zonë, mund të depërtojnë në punime për të siguruar fitime të mëdha. Disa grupe qytetarësh po bëjnë fushatë kundër urës, duke e quajtur atë të panevojshme, dhe shoqatat mjedisore këtë javë paraqitën një ankesë në Bashkimin Evropian, duke sinjalizuar rreziqe serioze për dëmtime mjedisore.