Uragani Melissa goditi Kubën herët të mërkurën, disa orë pasi shkaktoi shkatërrime në Xhamajkën fqinje ku u klasifikua si stuhia më e fortë në histori që ka goditur vendin ishullor të Karaibeve. Melissa goditi bregdetin jugor të Kubës lindore me erëra maksimale të qëndrueshme me shpejtësi prej 195 km/orë, tha Qendra Kombëtare e Uraganeve në SHBA. Rreth 735,000 njerëz u evakuuan nga shtëpitë e tyre në Kubën lindore ndërsa stuhia po afrohej, thanë autoritetet. Presidenti kuban Miguel Diaz-Canel paralajmëroi të martën se stuhia do të shkaktonte "dëme të konsiderueshme" dhe u bëri thirrje njerëzve të ndiqnin urdhrat e evakuimit. Melissa është dobësuar tani duke u kthyer në një uragan ende të rrezikshëm të Kategorisë 3. Stuhitë e Kategorisë 5, niveli më i lartë në shkallën e uraganeve Saffir-Simpson, sjellin erëra me shpejtësi prej më shumë se 157 km/orë. Në Xhamajkë autoritetet po bëjnë tani vlerësimin e dëmeve. "Raportet që kemi përfshijnë dëme në spitale, dëme të konsiderueshme në pronat private, shtëpitë dhe pronat komerciale, si dhe dëme në infrastrukturën tonë rrugore", tha kryeministri xhamajkan Andreë Holness për CNN pasi stuhia kishte kaluar.