Universiteti Mesdhetar i Shqipërisë dhe Universiteti i Tuscias (UNITUS) në Itali kanë zgjeruar bashkëpunimin ndërmjet tyre, duke nënshkruar një marrëveshje për krijimin e një programi të përbashkët Master Shkencor me diplomë të dyfishtë. Marrëveshja u firmos nga Rektorja e Universitetit të Tuscias, Prof. Tiziana Laureti, dhe Rektori i Universitetit Mesdhetar të Shqipërisë, Prof. Dr. Adrian Civici. Programi perfshin Masterin Shkencor në “Ekonomi, Menaxhim dhe Financë”, me profil “Ekonomi dhe Menaxhim për Inovacionin dhe Qëndrueshmërinë”, pranë Universitetit të Tuscias; Masterin Shkencor në “Administrim Biznesi”, me profilet “Sipërmarrje dhe Inovacion” dhe “Marketing, Shitje dhe Komunikim”, pranë Universitetit Mesdhetar të Shqipërisë. Mësimdhënia në të dy universitetet do të zhvillohet në gjuhën angleze.