Dominique Pelicot, francezi i akuzuar për drogimin e gruas së tij dhe rekrutimin e dhjetëra të huajve për ta përdhunuar atë gjatë gati një dekade, të martën pranoi akuzat me të cilat përballet dhe iu lut familjes së tij për falje, raportuan mediat franceze. Dominique Pelicot duhej të dëshmonte javën e kaluar në një rast që ka tronditur Francën, por paraqitja e tij u vonua për shkak të problemeve shëndetësore. Ai doli në gjyq me një shkop në dorë. "Unë i pranoj akuzat në tërësinë e tyre," tha 71 vjecari. "Unë jam një përdhunues ashtu si gjithë të tjerët në këtë dhomë... Kërkoj nga gruaja ime, fëmijët e mi, nipërit e mi të pranojnë ndjesën time. Më vjen keq për atë që bëra. Kërkoj faljen tuaj, edhe nëse nuk mund të më falni”, tha ai. Pelicot përballet me akuza që përfshijnë përdhunimin, përdhunimin në grup dhe shkelje të ndryshme të privatësisë, duke regjistruar dhe shpërndarë imazhe seksuale. Ai tha në sallën e gjyqit se kishte pasur një edukim të vështirë dhe kishte qenë vetë viktimë e përdhunimit. Disa herë ai edhe kishte qarë në sallën e gjyqit, sipas gazetarëve që ndoqën procesin. Në seancë foli edhe bashkëshortja e tij, Gisele Pelicot, 72 vjec, e cila tha se për 50 vite kishte jetuar me një njeri që mendonte se nuk ishte i aftë për këto akte përdhunimi.