Donald Trump është tërhequr nga një pretendim i mëparshëm se ai do të takohet me Vladimir Putin vetëm nëse Volodymyr Zelenskyy do të jetë i pranishëm, ndërkohë që afati i dhënë prej tij, ndaj Moskës, për të shmangur sanksionet e mëtejshme, skadon. Presidenti rus tha një ditë më parë se shpresonte të takohej me udhëheqësin amerikan javën e ardhshme, me samitin që potencialisht do të zhvillohet në Emiratet e Bashkuara Arabe. Njoftimi i Putinit erdhi në prag të skadimit të një afati të Shtëpisë së Bardhë për Moskën për të treguar përparim drejt përfundimit të luftës trevjeçare në Ukrainë, përndryshe do të përballet me sanksione ekonomike shtesë. I pyetur të enjten nëse afati i tij për të premten do të zbatohej, Trump tha: "Do të varet nga Putini. Do të shohim se çfarë ka për të thënë. Unë vetë jam shumë i zhgënjyer". I pyetur nëse Putin duhej të takohej me Volodymyr Zelenskin, Trump tha: "Jo, nuk do ta bëjë". Dy zyrtarë të Shtëpisë së Bardhë dhe një zyrtar i lartë i administratës Trump kanë thënë se sanksionet dytësore ndaj Rusisë pritet të zbatohen të premten. Trump ka kohë që shpreson të shtojë Ukrainën në listën e luftërave për të cilat mburret se i ka ndaluar, duke pretenduar gjatë zgjedhjeve të vitit të kaluar se mund ta bënte këtë brenda një dite të vetme, por është frustruar që kur është rikthyer në detyrë.