Bordi i Transprancës ka rishikuar për herë të dytë brenda 24 orëve çmimet tavan të shitjes së naftës dhe benzinës. Sipas çmimeve të reja të bordit, tavani i ri për shitjen e naftës dhe të benzinës është ulur me tre lekë, për të dyja llojet e karburanteve dhe si në tregun e shumicës, ashtu edhe në atë të pakicës. Çmimi i ri tavan për shitjen me pakicë të naftës është vendosur 192 lekë, nga 195 që ishte, ndërsa me shumicë nafta do të shitet jo më shumë se 180 lekë. Benzina me pakicë është ulur nga 175 lekë për litër në 172 lekë, teksa me shumicë tregtimi i saj nuk duhet të tejkalojë 160 lekët për litër. Bordi thotë se çmimet caktohen në bazë të luhajtes së bursave ndërkombëtare. Çmimet e reja tavan të bordit do të qëndrojnë në fuqi deri në vendimin e radhës.