Panorama e koronavirusit paraqitet më e lehtësuar në harkun kohor të 24 orëve të fundit. Referuar të dhënave të ministrisë së shëndetësisë janë kryer 1 mijë e 383 testime, nga të cilat 167 qytetarë kanë marrë përgjigje pozitive nga testi i Covid19. Numrin më të lartë të qytetarëve të infektuar e ka Tirana, për t’u pasuar nga Vlora, Berati e Durrësi. Në total janë 5,129 pacientë aktivë me COVID19 në të gjithë vendin. Aktualisht në spitalet COVID po marrin trajtim 121 pacientë, nga të cilët 18 janë në gjendje më të rënduar. Me gjithë përpjekjet e mjekëve, në 24 orët e fundit ka 5 humbje jete. Një qytetar nga Korça 61 vjeç, dy qytetarë nga Tirana 67 vjeç dhe 81 vjeç, një qytetar nga Durrësi 71 vjeç dhe një qytetar 72 vjeç nga Mallakastra, nuk arritën t’i mbijetonin luftës me virusin vdekjeprurës. Ministria e Shëndetësisë i bën apel qytetarëve të vaksinohen sa më parë, për të mbrojtur veten dhe shëndetin e të tjerëve. Çdo qytetar mbi 16 vjeç, mund të vaksinohet në qendrën shëndetësore ose në pikën më të afërt të vaksinimit të përqëndruar.