Rritja e tensioneve në Ukrainën lindore ishte tema kryesore e bisedës telefonike që kancelarja gjermane, Angela Merkel zhvilloi me presidentin rus Vladimir Putin. Javët e fundit, janë shtuar ndjeshëm përplasjet mes separatistëve pro-Rusisë dhe forcave të Kievit. Frikën për një përshkallëzim të mundshëm të konfliktit e ka nxitur edhe një shtim i forcave ushtarake ruse në kufi me Ukrainën. "Presidenti i Rusisë dhe kancelarja gjermane shprehën shqetësim rreth përshkallëzimit të tensioneve në juglindje të Ukrainës. Putin foli për veprimet provokuese të Kievit, i cili kohët e fundit e ka përkeqësuar me qëllim situatën në vijën e frontit", tha Kremlini në një deklaratë. Më herët presidenti ukrainas, Volodymyr Zelensky, udhëtoi për në lindje të vendit, e përsëriti thirrjet drejtuar aleatëve perëndimorë për mbështetje. Konflikti shpërtheu në 2014, pasi Moska aneksoi gadishullin e Krimesë. Nga konflikti janë vrarë më shumë se 13.000 persona. Kievi dhe Perëndimi akuzojnë Rusinë se i mbështet separatistët me armatim dhe trupa, ndërsa Moska vetë i mohon të tilla pretendime.