Shpërthime të fuqishme dhe zjarre gjigante janë raportuar në disa rajone të Rusisë pas një vale sulmesh me dronë ukrainas, teksa presidenti amerikan, Donald Trump ka thënë se do t’i pozicionojë nëndetëset bërthamore “më afër Rusisë”, disa ditë para përfundimit të afatit që i ka dhënë Moskës për të arritur marrëveshje për paqe me Kievin. Shërbimi i Sigurisë i Ukrainës njoftoi se dronët e tij e kanë goditur një bazë ajrore ku ruhen dronët Shahed dhe bazën ushtarake Elektroprillad në Penza. Ushtria ukrainase ka raportuar edhe për sulme në rafineri të naftës. Autoritetet në rajonin Samara të Rusisë kanë bërë të ditur se ka pasur kufizimet në fluturimet ajrore.