Bisedimet për t'i dhënë fund luftës në Ukrainë kanë shënuar "shumë përparim" dhe ka mbetur vetëm "një çështje" mes Kievit dhe Moskës, tha të enjten i dërguari special i SHBA-së Steve Ëitkoff përpara një udhëtimi në Rusi. "Mendoj se e kemi cuar përpara situatën dhe ka mbetur vetëm një çështje... Kemi diskutuar variante të kësaj çështjeje, dhe kjo do të thotë se është e zgjidhshme. Pra, nëse të dyja palët duan ta zgjidhin këtë, do ta zgjidhim", tha Ëitkoff në margjinat e Forumit Ekonomik Botëror në Davos. I dërguari i Presidentit Donald Trump, i cili do të udhëtojë për në Moskë gjatë ditës, bashkë me dhëndrin e udhëheqësit amerikan, Jared Kushner, nuk dha detaje të mëtejshme. Ëitkoff tha se të dy ata nuk do të qëndronin në kryeqytetin rus gjatë natës dhe do të fluturonin direkt për në Abu Dhabi, ku bisedimet do të vazhdonin në grupe pune. Kremlini tha këtë javë se Presidenti Vladimir Putin do të takohej me Ëitkoff të enjten. Ndërkohë, Trump dhe Presidenti ukrainas Volodymyr Zelensky do të takohen në Davos. Trump përsëriti të mërkurën bindjen e tij të shprehur shpesh se Putin dhe Zelensky ishin afër një marrëveshjeje.