Dy ukrainaset që u gjetën të vdekura në zonën e Selvisë në Tiranë dyshohet se janë rekrutuar online për të ushtruar prostitucion në Shqipëri. 25-vjeçarja Antonina Kozachenko dhe 40-vjeçarja, Anastasia Lopukhova, që dyshohet se kanë gjetur vdekjen pas konsumit të ilaçeve dhe lëndëve narkotike, kanë hyrë në vendin tonë më datë 2 maj. Ato janë pritur nga një tjetër shtetase ukrainase, që ndodhej në Shqipëri prej dy muajsh. Të trija vajzat qëndronin në një apartament të marrë me qira në zonën e Selvisë. Policia ka marrë në pyetje mikeshën e tyre. Burimet thonë se dëshmia e saj ka qenë kontradiktore. Ajo ka deklaruar se kishin ardhur në Shqipëri si turiste, më pas për të kërkuar punë. Dy variantet e saj kanë ngritur dyshime për aktivitetin real të vajzave. Tre vajzat kanë hyrë në Shqipëri duke shfrytëzuar regjimin pa viza, që Shqipëria ka hequr me Ukrainën prej marsit të vitit 2022, si pjesë e përpjekjeve ndërkombëtare për t’u ardhur në ndihmë të larguarve nga lufta me Rusinë.