Ukraina ka publikuar imazhet e para të armës së saj më të re hibride mes raketës dhe dronit. Arma është pagëzuar me emrin Palianitsia, që Kievi thotë se është e projektuar për të goditur aeroportet ushtarake ruse dhe për të "shkatërruar potencialin sulmues të armikut" në distanca të largëta. Përdorimi i parë i suksesshëm i armës së re u konfirmua nga Presidenti Volodimir Zelenski gjatë fjalimit të tij për Ditën e Pavarësisë më 24 gusht dhe në një video e re e postuar në mediat e tij sociale më 25 gusht ka dhënë detaje të mëtejshme të projektit. Videoja fillon duke nënvizuar se Rusia ka lëshuar "43,000 lloje të raketave të ndryshme dhe bomba në Ukrainë" që nga fillimi i luftës. Shumica e tyre janë nisur nga bazat ajrore të vendosura thellë në territorin rus. Ukraina ka kërkuar goditjen e këtyre bazave me armët e Perëndimit, por ka marrë gjithmonjë një përgjigje negative. Për këtë qëllim, Kievi zhvilloi programin e vet të armëve dhe tashmë pretendon se ka gati raketën dron me rreze të gjatë veprimi.