Më shumë se 40 kompani ukrainase kanë kontrata për prodhim dronësh që do të përdoren në luftën kundër rusisë, thotë kryeministri ukrainas, Denys Shmihal. Ai foli në një event të mbajtur në përvjetorin e parë të krijimit të ‘Ushtrisë së donëve”, një projekt që ka mbledhur bashkë të gjithë prodhuesit ukrainas të mjeteve fluturuese pa pilotë. Kryeministri tha se prodhimi i dronëve që atëherë është rritur me shpejtësi marramendëse. Dronët e mbikqyrjes dhe sulmit kanë luajtur në fakt një rol kritik për të dyja palët në luftën mes rusisë dhe ukrainës, duke ndihmuar me shënjestrimin e armëve armike, gjurmimin e trupave dhe goditjen e tyre. Shmihal tha se qeveria ukrainase ka akorduar 1 miliardë dollarë këtë vit për të investuar në prodhuesit vendas të këtyre mjeteve. “Ne kemi eleminuar barrierat doganore për importimin e pjesëve dhe seteve të plota”, tha ai. Po ashtu është rritur edhe fitimi i prodhuesve me 25 për qind ndërsa një vendim është marrë për lehtësimin e prodhimit masiv të municioneve për dronët. Mikhailo Fedorov, ministër ukrainas për transformimin digjital, prezantoi rreth 1700 dronë në forum, mjete këto që po dërgohen të gjitha në frontin e luftës. Programi deri më tani ka trajnuar më shumë se 10 mijë operatorë dronësh në 26 qendra trajnimi dhe 10 mijë të tjerë do të trajnohen në të ardhmen. Sidoqoftë, disa zyrtarë ushtarakë ukrainas kanë nënvizuar së fundmi se avantazhi i rusisë në luftën elektronike ka bërë që efikasiteti i operacioneve të dronëve të bjerë pasi moska është në gjendje ti bllokojë ata.